Вуж Монья лыдӟиськон юртамы шуныт пумиськон ортчиз удмурт кылбурчиен, визьмо но йӧно воргоронэн Леонид Михайлович Громовен.

Вуж Монья лыдӟиськон юртамы шуныт пумиськон ортчиз удмурт кылбурчиен, визьмо но йӧно воргоронэн Леонид Михайлович Громовен.
Кылбуръёсын тымиськем пӧзись ошмесэз солэн кемалась ӧз усьтӥськы ай, книгаез но одӥгез гинэ дуннеез адӟиз ай, нош лыдӟисьёсызлэсь тросэзлэсь сюлэмъёссэс бугыртӥз ини.
Милям но асэныз Леонид Михайловичен но "Улонэз яратӥсько" кылбуръёсын бичетэныз матысь тодматскеммы потӥз.

Пумиськонмы сӥземын вал быдэс дуннеын Анай кыллэн нуналызлы, кудзэ пусйиськомы 21 тулыспалэ.

"Аслэсьтыд кылдэ яратытэк, мукетсэ уд дышы гажаны". Туж шонер гожтэм та кылъёсты тодмо удмурт кылбурчимы Даниил Яшин. Анай кылмы асьмелэсь дуннеез валанмес возьматэ. Со котькуд адямилэн улоназ нимысьтыз пытьы кельтэ.

Ми - удмуртъёс, милям анай кылмы - удмурт. Соин ик туннэ трос гинэ удмурт кылбуръёс но кырӟанъёс чузъяськизы лыдӟиськон юртамы. Нош кылбур но кырӟан котьку но ӵош вамышъяло. Леонид Михайловичлэсь но кылбуръёссэ синйылтӥзы ини тросэз крезьгурчиос. Тани милям но лулчеберет удысын тыршись арганчимы Иванова Фаина Павловна одӥг кылбурезлы крезьгур гожтэм. Та кырӟан ваньмылэсь сюлэмъёсмес бугыртӥз но синвумес поттӥз.

Леонид Михайлович, кылбуръёсты калыклы кулэ, соин ик тазалыкты мед луоз но ошместы мед пӧзёз ай. Нош лыдӟисьёсмылы луонлык кылдӥз тӧршор куномылэн "Улонэз яратӥсько" кылбуръёсын бичетэныз тодматскыны лыдӟиськон юртэ лыктыса. Книга тӥледыз возьма ини.
#АнайКылКужым
#ПичиПургаУдмуртКенеш
#Деньродногоязыка