Туннэ, 23-тӥ куарусёнэ, 55 арес тырмысал удмурт но ӟуч кылбурчилы, журналистлы Эрик (Валерий) Батуевлы.
Дэри ёросысь Симанки гуртын вордскем пияш Москваысь кун университетын журналистикая факультетын, собере аспирантураын дышетскиз. Москваысь газетъёсын корреспондент луыса ужаз. Дуннеысь «пӧсь интыосысь» — Палестинаысь, Израильысь, Афганистанысь, Курдистанысь, Турциысь, Таджикистанысь, Косовоысь, Иранысь репортажъёс лэсьтылӥз. Ожгар корреспондент луыса быдэс Чечняез но Уйпал Кавказэз ортчиз. 2002-тӥ арын Палестина сярысь «Война обетованная» ужзэ «Устоез статья» номинациын пусйизы.
Улэп дыръяз ай удмурт но ӟуч кылын кылбуръёсыныз ньыль бичетэз потӥз: «Гольык», «Тень моей жизни», «Пӧртмаськись ошмес», «По венам из сердца уходит любовь».
Бадӟым таланто кылбурчилэсь но журналистлэсь улонзэ 2002-тӥ арын 31-тӥ южтолэзе потон уе куспетӥ каризы. Берло ини кылбуръёсыныз, публицистикаен но тодэ ваёнъёсын «Уйшор вуюись» (2005) но «Сюлэмлэн сэрего яръёсыз» (2009) бичетъёс поттӥзы. 2003-тӥ арын куартолэзе Москваысь гожъясьёслэн огазеяськонзы Эрик Батуевез «Венец» премиен пусйиз — таланто кылбуръёсыз но яркыт публицистикаез, батырлыко кылбурчи но журналист луэмез понна.
2005-тӥ арын Дэри ёрос администарци Эрик Батуев нимо литература премиез юнматӥз. Нырысетӥ премиез анаезлы Анна Филипповналы сётӥзы. 2011-тӥ арысен Эрик Батуев нимо йӧскалык премиен удмурт лулчеберет, история, удмуртъёслэн ужрадъёссы сярысь ивортӥсь журналистъёсты пусъё.
Ӟыгыртӥ кызьпуэз –
лэземе но уг пот;
мальдытӥз чеберез –
кошкеме но уг пот.
Туж кема мон утчай
вожалэс синъёссэ.
Сюлмысьтым ик чупай
юг-тӧдьы мугорзэ.
Туспуктэм: peoples. ru
