Лидапай выж кылдӥз Баграш-Бигра гуртын.
Родниковой ульчаысь Лидия Павловна Васильевалэн бакча бераз бызе пичи ошмес. Пӧсь куазен со шумпоттытэ юзмыт, чылкыт вуэныз, нош кезьыт куазен ӧте дораз жильыртӥсь куараеныз.
Юнме уг верало калыкын - ошмес ву туж пайдаё, адямилы трос кужым сётэ шуыса. Тани биграос но шуо: «Зэм но, ву но татын котьку но ческыт»
Ошмес вань бере – сое учкись но кулэ. Лидапай ӵем гинэ та ошмесэз утялтыса, эскерыса возе вал. Со борды итӥськизы бускельёсыз- кузпалъёс Чибышевъёс. Дэмен уж но капчиен сётӥськиз. Ошмес котырысь жуг-жаг утялтӥськиз, силё поттаськиз.
Нош туэ гужем Бигра гуртысь
клубын ужасьёс «Ошмес син» нимо программа гожтӥзы. Та программая лэсьтӥськиз ошмес доры васькон сюрес, мерттӥськиз сяська, кылдӥз пукон инты но кенер. Ваньзэ сое ужазы пиналъёс, эшшо возаз уждун но басьтыны быгатӥзы.
Ужась адямиез уж ачиз шедьтэ, шуо. Озьы ик луиз. Ошмесэз утялтэмзы бере, биграослэн мылкыдзы ӝутскиз выж лэсьтыны.
ООО "Первый май" сётӥз пиломатериал, нош депутат Петр Матвеевич Фомин коньдонэн юрттӥз . Таӵе юрттисьёсын уж но чаляк пӧрмиз.
Выж лэсьтӥськиз. Пыриськизы вань Родниковой ульчаын улӥсьёс, Вуж Моньялась Лидапайлэн пиосыз но ветлӥзы. Нош выжез усьтыны но ошмес вуэн чай юыны ӧтизы
"Чингыли" нылпи садысь нылпиосты. Кырӟанэн шулдыртӥзы клубын ужасьёс.
Оскон кылдэ, ошмес ноку уз куасьмы, куке вань таӵе ӟеч сюлэмо сюлмаськись гурт калык. Нош Лидапай выжтӥ биграос ог-огзы доры куное. шумпотыса ветлозы.
