Туннэ 90 арессэ пусъе ужысь ветеран Марина Михайловна Голубкова.
Маринапай вордӥськиз, будӥз, улӥз но пересьмиз Сундуково гуртын. Семьяязы кык ныл но пи вал. Атайзэс, Михаил Данилович Бегитовез, оже басьтӥзы. 1941-тӥ арын ик ивортэк ышиз.
4 класс сяна дышетскыны ӧз кылды. Кечолэ 5 классэ мынэм вылэм но, улон инты ӧвӧлтэмен, улон секытэн тулыс школазэ куштэм.
Мемеез етӥн сэстыкуз пал суй кылем, озьы ке но, адямилэсь бере кыльытэк ужам. Нылаш мемеезлэн бур киыз вал. Ӵошен пудо сюдӥзы.
- Кыӵе пудо-живот вал фермаын, ваньзэ сюдӥ-утялтӥ, - тодаз вае Марина Михайловна. – Скал, ыж, вал, парсь, кык ар нюлэскы пу но дасяны ветлӥ.
1956-тӥ арын кузпалъяськизы Василий Васильевич Голубковен, 3 пи но ныл будэтӥзы. Али ужысь ветеранлэн 8 внукъесыз, 11 правнукъесыз.
2003 арын кузпалыз кулӥз. Со дырысен огназ улэ. Кыкез пиосыз Сундуковоын ик уло, эскеро, утялто. Пичиез пиез городэ кошкиз ке но, котькуд шутэтскон нуналъёсы бертылэ. Али корка вӧзаз корка пуктэ.
Уно секытэз адӟемын ке но улоназ, Маринапай капчи мылкыдо, шоккетӥсь. Али синмыз аламагес адӟе ини. Озьы ке но, корка пушказ вань ужзэ ачиз лэсьтыны быгатэ. Телевизорез ужа, радиоез кырӟа. Ачиз но уго со али но туж шулдыр кырӟа, трос кырӟанъёсты тодэ.
Гажано Марина Михайловна! Сюлмысьтым ӟечкыласько Тӥледыз та бадӟым котырес лыдпусэныды. Сӥзисько тазалык, шудбур, ӟеч мылкыд, вӧзады котьку мед луозы Тӥледыз яратӥсь адямиос!
#дата #юбилей #ЛюдиДела
