"Буре ваём дано Юри нылмес"
15:00 14.10.2025 16+
"Буре ваём дано Юри нылмес"
"Дунне вылэ адями вордӥське кырӟаны,
Кырӟаны-вераны, ӟеч ужъёс лэсьтыны,
Одӥг-огедлы юрттыса, калыкен тупаса,
Огкылысь, чеберен, югыт малпанэн улыны".
Та кылъёс пырак тупало Улын Юри гуртын вордӥськем, будэм но вань сюлэмзэ сётыса ужам дышетӥсьлы, Россия Федерациысь дышетон удысысь сиё-дано ужасьлы, Самсонов нимо премилэн лауреатэзлы, шаертодосчилы Фёдорова Людмила Ильиничналы.
Улын Юри шор ёзо [https://vk.com/nizhnie.yuri|школаын] Фёдорова Людмила Ильиничналы 75 ар тырмонэзлы сӥзем пумиськон ортчиз.
Туж трос тодэ ваёнъёс но шуныт кылъёс чузъяськизы Людмила Ильиничналы сӥзьыса.
Улон-вылон сюресэз Юри нылмылэн, улосчимылэн туж узыр.
1971-тӥ арысен Людмила Ильинична ужаны кутске Улын Юри школаын. Нуэ англи кылъя но история предметъёсъя урокъёсты. Ужамен валче йылпумъя УдГУ-ысь историяя факультетэз, тунсыкъяськыны кутске гуртлэн историеныз, вашкала калыклэн улэм-вылэменыз.
90-тӥ аръёсы быдэс гурт калыкен, школаысь пиналъёсын бичамын вал вашкала экспонатъёс, кырӟанъёс, турын-куарен эмъяськон амалъёс. Озьы школаын ортчылыны кутскизы гуртысь мӧйы калыкен ӵош удмурт йылолъёсты возьматъян. Со сяна, Людмила Ильинична кивалтэм улсын научно-практической конференциос ортчылыны кутскизы.
Вуж школалэн юртаз 1990-тӥ арын усьтэмын вал музей. Нимаськиз со: «Внутреннее убранство удмуртской избы начала 20 века» шуыса.
Людмила Ильинична матысь кусып возиз гуртысь мӧйы калыкен, соосын одӥг кыл шедьтыны быгатылӥз. Школаын ортчылӥзы фольклорной вечеръёс, кудаз мылысь-кыдысь пыриськылӥз мӧйы калык но. Озьы пиналъёсын, мӧйыосын ӵош ортчытъямын вал нуны сюан, сюан-бӧрысь, солдат пи келян, виртырем сиён, веме лэсьтон, Пасха но гурт-калыклэн азьло улонысьтыз ортчылӥсь мукет ужрадъёс.
Мылысь-кыдысь пыриськиз гурт улонэ но. 1996 арын гуртысь краеведэн Ильин Никита Ильичен ӵош ортчытӥзы гуртлэсь 300 ар тырмонзэ.
Людмила Ильинична 13 арзэ школаын директор но вал. Солэн кивалтэмез улсын школа пыриськиз миллион грант басьтонэ но утӥз 800 000 манет коньдон. Школа пыриськиз «Образование без границ» республиканской конкурсэ но «Этническая культура как ресурс развития конкурентоспособной личности» проектэ.
Пенсие потэмез бере но Людмила Ильиничналэн ужез пӧзиз. Музейлы ӟеч инты шедьтыса, сомында экспонатэз интыяны кулэ вал. Солэн татын но ваньмыз пӧрмиз. Пиналэныз но, пересеныз но музейын портэм ужрадъёс ортчылӥзы.
Гурт-калыксэ гажаменыз, вордскем шаерзэ яратэменыз Людмила Ильинична гажано но яратоно адями луиз. Нош быгатысал меда одӥг адями тамында ужез бергатыны, ой луысал ке вӧзаз оскымон эшез. 50 ар ӵоже вӧзаз ялан юрттӥськиз, малпам ужъёссэ быдэсъяны мылкыдзэ ӝутъяз кузпалыз - Фёдоров Михаил Никандрович. Пушкыз тырыса, шуныт но небыт кылъёсын со тодаз ваиз аслэсьтыз кузпалзэ. Чебересь, визьмоесь, йоноесь нылпиосыз но нунокъёсыз кужым сётӥзы, дыр, Людмила Ильиничналы сомында ужез берыктыны.
Та ужрадэ пыриськизы гурт калык, ӵыжы – выжыез, ӧтем куноос:
Пичи Пурга ёрослэн тӧроез - [https://vk.com/id825452118|Александр Алексеевич Деев]
Удмурт Элькунысь Кун Кенешлэн тӧроезлэн воштӥсез - [https://vk.com/tatyanaishmatova|Татьяна Витальевна Ишматова]
Пичи Пурга депутатъёслэн ёрос кенешсылэн тӧроез - [https://vk.com/id364955688|Людмила Яковлевна Бикшинтеева]
Пичи Пурга депутатъёслэн ёрос депутатэз - [https://vk.com/id563337135|Василий Ермолаевич Москвин]
Дышетонъя управленилэн кивалтӥсез - [https://vk.com/id437127337|Ольга Эдуардовна Полканова]
Улын Юри ёзэтлэн кивалтӥсез - [https://vk.com/id542472314|Борис Семёнович Николаев]
Россиысь но Удмуртиысь культура удысын дано ужась - Екатерина Леонидовна Антонова.
#ВечерПамяти #МалопургинскийРайон
