ЛЫДӞИСЬКОН СЭРЕГ
Таиз ЗАРНИ КОМОК вордӥськемын асьме ёросамы. Алигес пусъемын Удмурт Элькунлэн Тӧроезлэн "Признание" премиеныз. Озьыен, лыдӟе Гриша Григорьевлэсь «ТылКыл» этножурнал понна нимысьтыз дасям вачевераськонэз.
— Григорий, кызьы кутскиды приложениосын, программированиен тунсыкъяськыны?
— Мыным школаысен ик кельше вал программирование, озьы ик мобильной приложениосты кылдытон. Соку смартфонъёс ӧй вал на. Университетын дышетскыкум ини потӥз андроид. Мынам потэ вал тодэме, кызьы солы программаос гожъяно.
Со вакытэ ик мон лэсьтӥ удмурт раскладка Windows-лы компьютере. Адямиос кутскизы юалляськыны: «Малы телефонын ӧвӧл сыӵе раскладка?». Мукет приложениез учкыса, эскерыса, удмурт раскладка андроидлы лэсьтӥ. Озьы калленэн кутски приложениос лэсьтыны.
— Кытысь тодон-валан басьтӥды?
— Бадӟым классъёсын тунсыкъяськыны кутски программированиен, но школаын солы ӧз дышетэ. Дорын вал компьютер, мыным вал туж тунсыко валаны, кызьы со ужа, кызьы лэсьтӥсько программаос, приложениос, шудонъёс. Ижкарын басьтӥ книга-самоучитель Паскаль кылъя, соя дышетски. Кызьы ке но озьы информатикаен олимпиадаын вормисе но потӥ вал. Школа бере пыри дышетскыны математической факультетэ Удмурт кун университете, озьы ик дышетски программирования курсъёсын. Берло ужан но кутски.
— Нош кызьы малпаськоды приложениосты? Дасьсэ ужзэ кутӥськоды яке выльзэ малпаськоды?
— Ӵемысь учкисько, кызьы лэсьто мукет адямиос. Соослэсь вань умой интыоссэ басьтыса, аслэсьтымзэ ватсаса, приложение пӧрмытӥсько.
— Нош кин лэсьтэ приложениослэсь яке сайтъёслэсь дизайнзэс?
— Ку кызьы пӧрме. Каньыл ке, отын дизайнзэ турттӥсько лэсьтыны ачим. Со мыным тунсыко арбери йӧтэ. Кыӵе ке бадӟым проект ке, вазиськисько эшъёсы доры, дизайнеръёс доры. Шуом, Вера Штыкова мыным ӵемысь юрттӥськылӥз шудонъёслы, приложениослы дизайн лэсьтон бордын. Озьы ик «Монами» дизайн-студия юрттӥськылӥз.
Озьы ик Никита Моромовен приложениез быдэстӥм, кудзэ кутским «Шундыкар» лагерьын. Ӵапак со Play Market-ын вань ни.
— Нош мар приложение со?
— Со шудон «Кыл шормуӵ» нимаське яке «Остров слов» ӟуч кылын. Со шудон, кытын шедьтоно «шормуӵъёсы» ватскем удмурт кылъесты. Соку азьлань мынодд.
— Уксё вае-а удмурт проектъёсын ужан?
— Мынам вань приложениосы дунтэк. Валасько, пользовательёс ичи, но соослэсь уксё кыскыны шонер ӧвӧл. Мон ужасько удмуртлыкез азинтон понна но кыӵе ке но оскон сётыны адямиослы, ваньмызлы уксе понна уг лу шуыса. Нош али валасько, уксётэк секыт шуыса. Приложениосты дунэн лэсьтӥ ке, со уксё понна уз лу, со луоз мотивация понна. Мон валало, та приложение мыным уксё вае бере, мыным кулэ сое азьланьтыны. Соин малпасько азьланяз приложениос луозы яке дунэн, яке рекламаен.
— Кытын ке но ужаськоды на-а?
— Мускоысь компаниын старший инженер разработчикен, ужасько онлайн амалэн.
— Кыӵе тужгес бадӟым вормонды вань?
— Со удмурт кылэз дышетонъя приложение «Кылдысин». Со пӧрмиз озьы, кызьы мынам потэ вал, шекъесыз вань ке но. Адямиос верало, кельше шуыса.
— Нош кызьы тӥ шутэтскиськоды телефонлэсь яке компьютерлэсь?
— Мон кутскисько ужаны 11 часысен 7 часозь бере, ӵукнагес вырисько потаны кыре. Яке спортэн вырисько.
— Нош мар тӥледыз азьлань мыныны косэ?
— Мон уг яратӥськы тэк пукыны. Со гуртын будэмен-а мар-а, ку ке кулэ весь мар ке но ужаны. Самооценкаме но будэтон понна мон лэсьтӥсько мар ке но весь.
— Кыӵе тӥляд льӧль малпанды вань?
— Корка пуктэме потэ мыным кельшись интыын, тупась формаен.
— Удмурт элькунлэсь Тӧроезлэсь премизэ басьтэм бере кызьы улонды воштӥськиз?
— Мон понна со туж бадӟым дунъет. Мынам улонэ зол ӧз воштӥськы кадь. Со воштӥз кӧня ке самооценкаме, малы ке шуоно дунъет ужелы сетӥзы.
— Кыӵе приложениосын тӥ ӵемгес выриськоды?
— Нырысь ик со телеграмм, яратӥсько инстаграммын пукыны, озьы ик удмурт клавиатура.
— Али дыре мар бордын ужаськоды?
— Лэсьтӥм удмурт кылын вераськись синтезатор. Со сыӵе программа, кудӥз ужа нейрон вотэс амалэн. Светлана Пикулева (журналист но передачаосты нуись - ред.) сое лыдӟиз, Денис Корнилов (удмурт режиссёр - ред.) юрттӥськиз собере лэсьтыны, дасяны со данноёсты. Озьы капчигес кылэз дышетыны: сетӥське текст, кылӥське куара, кызьы сое кулэ лыдӟыны. Ми солы сетӥськом текст, приложение кылъёслэсь куара поттэ.
Таяз арысен кутском ужаны распознаватель бордын. Куараысь потоз текст. Таиз секытгес уж, малы ке шуоно куараос пӧртэм луыны быгато, кодькудӥзлэн аслаз куараез, аслаз диалектэз. Ми малпаськом, со туж кулэлыко программа.
— Кинлы тау верамды потэ?
— Тау шуэм потэ анай-атайлы, соос монэ будэтӥзы, вордӥзы шуыса. Озьы ик тау шуэм потэ дышетӥсьёслы, ӧз уськытэ тунсыкъяськонме математикалы, физикалы но дышетсконлы. Озьы ик спортлэн тренерлы, со монэ спортэз яратыны дышетӥз. Озьы ик эшъёсылы, кудъёсыз монэ поддерживать каро, верало, кулэ уж лэсьтӥсько шуыса.
Вакчи юан – вакчи веран
— Кыӵе юанлы тӥляд валэктон тодэмды потэ?
— Хм… Вань-а ин сьӧрын улон?
— Нош кыӵе юан тӥледлы ӵемгес сётъяло?
— Малы мыным УДМУРТЛЫК кулэ. Малы мон лэсьтӥсько со приложениосты.
— Нош кыӵе льӧль малпанды?
— Тупаса улон мед луоз. Медаз удмурт кыл ноку но быры шуыса. Ужам ужмы юнме медаз лу вал.
Милемлы туж кельшо солэн приложениосыз. Гришалэсь кулэ басьтыны пример. Со выль амалъёсты пыртыса, удмурт кылэз азинтэ.
Программист и активист удмуртской молодежной организации «КУАРА» Григорий Григорьев получил премию Главы Удмуртии «Признание»!
Григорий является младшим научным сотрудником лаборатории машинного обучения и обработки «больших» данных производственных киберсистем Удмуртского Федерального Исследовательского центра Уральского Отделения Российской Академии Наук. Уже более 6 лет лауреат занимается мобильной разработкой.
Благодаря Григорию удмуртский стал первым языком народов России, на котором «заговорило» приложение для водителей «Яндекс.Навигатор». В этом году при его непосредственном участии был создан синтезатор удмуртской речи. Также, наш лауреат является разработчиком удмуртской клавиатуры, приложения для изучения удмуртского языка «Кылдысин», мобильной игры «Ӧлиас» («Alias») и других.
#зарникомок#лыдӟиськонсэрег#угнг #удмуртгимназия #тылкыл #этножурнал_тылкыл #угнг_допобразование
